28 नवम्बर छ.ग. राजभाषा दिवस पर विशेष कविता रचना – नेमी राम रजक
28 नवम्बर छ.ग. राजभाषा दिवस विशेष…….
हमर गोठ बात
मैना सुवा के गुरतुर बोली कस
हावय मयारू छत्तीसगढ़ी बोली ।
अमरइया के कोइली कस कुहके
मीठ मीठ इंहां के हंसी-ठिठोली ।।
बड़े फजर ले राम नाम संग
पहिली होथे बात गोठ ।
मया-पिरीत के बंधना म बंधाये
छत्तीसगढ़ी भाखा हावय सबले पोठ ।।
बड़ मनभावन निश्छल पावन
छत्तीसगढ़ी बानी हे ।
झूठ लबारी अंतस म नइ राहय
सादा-सादा इंहा के जिनगानी हे ।।
राजभाखा हमर पुरखा के थाती ये
येला जतन करके राखे ल परही ।
पढ़ई-लिखई सरकारी काम कारज होही
तभे छत्तीसगढ़िया के मान सनमान बड़ही ।।
आप सब ला छत्तीसगढ़ राजभाषा दिवस के हिरदे ले बधाई
रचना
नेमी राम रजक
प्रधान पाठक
शासकीय प्राथमिक शाला -खैरी
वि.खं.-साजा,जि-बेमेतरा
